नाशिक : नाशिक जिल्ह्यातील सिन्नर - शिर्डी राष्ट्रीय महामार्गावर पांगरी शिवारात नादुरुस्त शिवशाही बसमध्ये चालकाने आत्महत्या केल्याची धक्कादायक घटना घडली आहे. कमरेला बांधण्याच्या करदोऱ्याच्या साहाय्याने या चालकाने गळफास घेऊन आत्महत्या केली. ही घटना गुरुवारी मध्यरात्रीच्या सुमारास उघडकीस आली आहे. राजू हिरामण ठुबे (वय ४९, रा. दोनवाडे (भगूर), ता. नाशिक) असं आत्महत्या केलेल्या चालकाचं नाव आहे. चालक राजू ठुबे हे राज्य परिवहन महामंडळाच्या नाशिक आगार क्रमांक एक मध्ये कार्यरत होते.
शिर्डी येथून नाशिककडे शिवशाही बस क्रमांक एमएच ०९ ईएम १२८० घेऊन ते जात असताना दुपारी पावणेतीन वाजेच्या सुमारास सिन्नर तालुक्यात वावी सोडल्यानंतर पांगरी शिवारात बस नादुरुस्त झाली. या बसमधील प्रवाशांना पाठीमागून येणाऱ्या बसमध्ये बसवून दिल्यानंतर ठुबे यांनी सिन्नर आगारात निरोप देऊन दुरुस्ती पथक पाठवण्याची विनंती केली होती. मात्र, सायंकाळी उशिरापर्यंत सिन्नर येथील दुरुस्ती पथक न आल्यामुळे त्यांच्यासोबत असलेली महिला चालक देखील निघून गेली.
रस्त्यात बिघडलेल्या बससोबत चालक ठुबे एकटेच होते. रात्री सव्वा ते दीड वाजेच्या सुमारास सिन्नर येथील दुरुस्ती पथक बिघडलेल्या बसजवळ आले. यावेळी पथकातील काही कर्मचाऱ्यांनी ठुबे यांना आवाज दिला, परंतु त्यांना कुठलाही प्रतिसाद मिळाला नाही. त्यानंतर त्यांनी बसमध्ये प्रवेश केला, अंधार असल्याने मोबाईल टॉर्च लावून बसमध्ये ठुबे यांना शोधण्यास सुरुवात केली तेव्हा पाठीमागे शेवटच्या शीटाजवळ ठुबे यांचा लटकलेल्या अवस्थेत मृतदेह आढळून आला.
कमरेला बांधण्याच्या करदोरा बसच्या छताकडील एअर विंडोच्या हुकला अडकवून घेत चालक ठुबे यांनी आत्महत्या केली होती. यानंतर बस दुरुस्ती पथकातील कर्मचाऱ्यांनी तात्काळ सिन्नर आगारात याबाबत माहिती दिली. त्यानंतर याची माहिती पोलिसांना कळविण्यात आली आणि रात्री दीड वाजता पोलिसांनी घटनास्थळी धाव घेतली. त्यानंतर एका खासगी रुग्णवाहिकेतून बस चालक ठुबे यांचा मृतदेह सिन्नर येथील उपजिल्हा रुग्णालयात पाठवला. या प्रकरणी वावी पोलीस ठाण्यात आकस्मिक मृत्यूची नोंद करण्यात आली असून चालक राजू ठुबे यांच्या आत्महत्येचं कारण अद्याप समजू शकलेलं नाही.
0 Comments