पुणे: महाराष्ट्र राज्य माध्यमिक व उच्च माध्यमिक शिक्षण मंडळातर्फे बारावी आणि दहावीच्या लेखी परीक्षांचे अंतिम वेळापत्रक प्रसिद्ध करण्यात आले आहे. त्यानुसार 21 फेब्रुवारी ते 21 मार्च या कालावधीत बारावीची तर दोन ते 25 मार्च या कालावधीत दहावीची परीक्षा होणार आहे. राज्य मंत्रिमंडळाने प्रसिद्धी पत्रकार द्वारे ही माहिती दिली आहे.
पुणे, नाशिक, लातूर, मुंबई,नागपूर, कोल्हापूर, अमरावती आणि कोकण, या विभागीय मंडळात मार्फत होणाऱ्या बारावी आणि दहावीच्या परीक्षांचे संभाव्य वेळापत्रक राज्य मंडळातर्फे 19 सप्टेंबरला जाहीर करण्यात आले होते. तसेच वेळापत्रकाबाबतच्या लेखी सूचना पंधरा दिवसात मागवण्यात आल्या होत्या. त्यानुसार संघटना, पालक, शिक्षक यांच्याकडून आलेल्या सूचना विचारात घेऊन बारावी आणि दहावीच्या लेखी परीक्षेचे वेळापत्रक अंतिम करण्यात आले आहे. प्रात्यक्षिक, तोंडी परीक्षा,श्रेणी परीक्षांचे वेळापत्रक स्वतंत्रपणे शाळा, कनिष्ठ महाविद्यालयांना कळविण्यात येईल, असे मंडळाने नमूद केले आहे.
दरम्यान शाळा, कनिष्ठ महाविद्यालयाकडे येणाऱ्या छापील स्वरूपातील वेळापत्रकावरून परीक्षांच्या तारखांची विद्यार्थ्यांनी खात्री करून घेऊन परीक्षा द्यावी, तसेच संकेतस्थळावरील, समाज माध्यमातील वेळापत्रक ग्राह्य धरू नये असेही मंडळांनी स्पष्ट केले आहे.
0 Comments