🔹हवामान थंड होताच हृदयविकाराचा धोका खूप वाढतो.
🔹हृदयरोग तज्ञ डॉ. अनिल रुडे यांचा जनहितार्थ सल्ला.
नागपूर / प्रतिनिधी दि. 11/12/2022:-
हृदयविकाराचा झटका टाळायचा असेल तर काही महत्त्वाच्या गोष्टीं व्यतिरिक्त त्याची काही लक्षणेही जाणून घेणे आवश्यक आहे. ज्यामुळे वेळीच स्वत:सोबत इतरांचा जीव वाचविण्यासाठी मदत होते.
माइल्‍ड हार्ट अटॅकची लक्षणं, ताबडतोब डॉक्टरांकडे जा नाहीतर जीव धोक्यात येऊ शकतो .
हृदयविकाराच्या झटक्याने दरवर्षी जगभरात लाखो लोकांचा मृत्यू होतो. अशा परिस्थितीत टीव्ही आणि सिनेमाच्या माध्यमातून हृदयविकाराची लक्षणे माहीत होतात.यामध्ये छातीत दुखणे, अस्वस्थ वाटणं आणि घाम येणं यांचा समावेश होतो. पण याशिवाय हृदयविकाराची अशीही काही लक्षणे आहेत ज्यांची माहिती फार कमी लोकांना आहे. ही लक्षणे गांभीर्याने न घेतल्यास जीव देखील जाऊ शकतो. म्हणूनच मायनर हार्ट अटॅकच्या काही न ऐकलेल्या लक्षणांबद्दल माहिती देणे महत्त्वाचे वाटते. त्यांच्याबद्दल जाणून घेतल्यास स्वत:चाच नाही तर घरातील इतर अनेक व्यक्तींचा जीव वाचविण्यासाठी मदत होते.
हृदयविकाराचा झटका ही अशी स्थिती आहे ज्यामध्ये हृदयाला होणारा रक्तपुरवठा खंडित होतो. रक्ताच्या धमन्यांमध्ये जमा होणारे फॅट कोलेस्टेरॉल हे यामागचे मुख्य कारण आहे. अशा परिस्थितीत, रक्तवाहिन्यांमधील अडथळा वेळेवर दूर केला नाही तर शरीरात ऑक्सिजनची कमतरता निर्माण होते आणि हार्ट टिश्यूस संपू लागतात. सौम्य हृदयविकाराच्या झटक्यावेळी हृदयाच्या फक्त एका लहान भागावरच परिणाम होतो, ज्यामुळे हृदयाला कायमचे किंवा मोठे नुकसान होत नाही. याचे कारण असे की सौम्य हृदयविकाराच्या झटक्यामध्ये, रक्त प्रवाह कमी होण्यास कारणीभूत असलेल्या लहान रक्त धमनीत अडथळा येतो. यामध्ये धमनीतील रक्ताभिसरण (blood circulation) पूर्णपणे थांबत नाही किंवा ब्लॉक होत नाही. त्यामुळे त्याची लक्षणे काही काळच दिसून येतात. पण याचा अर्थ असा मुळीच नाही की सौम्य हृदयविकाराचा झटका धोकादायक नसतो. उलट यामुळे हार्ट फेलियर, हृदयाचे ठोके असामान्य होणे आणि दुस-या हार्ट अटॅकची स्थिती निर्माण होऊ शकते. सौम्य हृदयविकाराची काही लक्षणे जाणून घेऊन उपाययोजना करणे आवश्यक आहे.
हृदय किंवा जबड्यातील वेदना हृदयविकाराच्या झटक्याशी संबंधित असल्याचं कोणाच्या ध्यानीमनीही येत नाही. पण ही सौम्य हृदयविकाराची (mild heart attack) लक्षणे आहेत. मानेच्या मागच्या बाजूला किंवा जबड्यात हलक्याश्या वेदना होणे हलक्यात घेतल्याने स्थिती आणखीनच बिघडू शकते. ही लक्षणे विशेषतः स्त्रियांच्या बाबतीत सर्वात सामान्य आहेत. यामध्ये वेदना जबड्यापासून सुरू होऊन मानेपर्यंत पसरते. ही वेदना अचानकच सुरू होते आणि याआधी कोणतेही चेतावणीचे संकेत मिळत नाहीत. तसेच, वर्कआउट सेशननंतर ते अधिक धोकादायक होऊ शकते.
हातात वेदना होणे किंवा मुंग्या येणे.
हातामध्ये वेदना होणे किंवा मुंग्या येणे हे सौम्य हृदयविकाराच्या लक्षणांपैकी एक आहे. सहसा हे लक्षण व्यक्तीच्या डाव्या हातापासून सुरू होऊन शरीराच्या खालील डाव्या बाजूला जाऊ शकते. याव्यतिरिक्त छाती आणि मानेमध्येही वेदना जाणवू शकतात, कधी कधी या वेदना जाणवतही नाहीत.
घाम येणे, तीव्र कसरत सेशन नंतर किंवा उन्हाळ्यात घाम येणे खूप सामान्य आहे. पण जर तुम्हाला बसल्या बसल्या किंवा रात्री अचानक घाम येऊ लागला तर ते हृदयविकाराच्या झटक्याचे लक्षण असू शकते. या लक्षणाकडे अजिबात दुर्लक्ष करू नका आणि ताबडतोब रुग्णवाहिका बोलवा.
धाप लागणे आणि चक्कर येणे ,पायऱ्या चढल्यानंतर दम लागत असेल आणि लांब मॅरेथॉन धावून आल्यासारखे वाटत असेल, तर तुमचे हृदय नीट काम करित नसल्याचे ते लक्षण असू शकते. धाप लागणे किंवा चक्कर येणे याव्यतिरिक्त छातीत दुखणे आणि इतर लक्षणे देखील हृदयविकाराचा झटक्याचे संकेत देऊ शकतात. ही लक्षणे स्त्री आणि पुरुष दोघांमध्येही दिसून येतात. तथापि, अशी लक्षणे महिलांमध्ये अधिक दिसून येतात.
ढेकर, हार्ट बर्न आणि पोटदुखी अनेक प्रकरणांमध्ये, पोटाशी संबंधित अनेक समस्या देखील हृदयविकाराच्या झटक्याचे लक्षण असू शकतात. ढेकर येणे, छातीत जळजळ होणे, पोटदुखी इत्यादी. ही सौम्य हृदयविकाराची लक्षणे असू शकतात. ही लक्षणे पुरुषांपेक्षा स्त्रियांमध्ये अधिक सामान्य आहेत.
हार्ट अटॅकपासून बचाव करण्यासाठी उपाय आहेत. निरोगी शरीर हवे असेल तर योग्य आहार निवडा आणि नियमित व्यायाम करत राहा. याशिवाय संपूर्ण जीवनशैली बदलून तणावमुक्त जीवन जगा. तसेच हृदयविकाराच्या झटक्याची कोणतीही लक्षणे हलक्यात घेऊ नका. लक्षणे दिसताच डॉक्टरांशी ताबडतोब संपर्क साधुन उपचार सुरू करावे.
हे कोणत्याही प्रकारे कोणत्याही औषधाचा किंवा उपचारांचा पर्याय असू शकत नाही. नेहमी आपल्या जवळच्या डॉक्टरांशी संपर्क साधावा असा जनहिताच्या,ह्दय आजार विषयक महत्त्वाचा सल्ला गडचिरोली जिल्हा सामान्य रुग्णालयचे जिल्हा शल्य चिकित्सक तथा हृदय रोगतज्ज्ञ डॉ. अनिल पुढे यांनी दिला.
0 Comments