पोंभुर्णा (जिल्हा चंद्रपूर), जून 22 –
पोंभुर्णा तालुक्यातील विविध गावांमध्ये गेल्या काही दिवसांपासून वारंवार वीजपुरवठा खंडित होण्यामुळे नागरिकांमध्ये तीव्र संताप व्यक्त केला जात आहे. काल रात्री संपूर्ण परिसर अंधारात बुडालेला दिसून आला, आणि हीच स्थिती आता दिवसा आणि रात्रीही कायम आहे. या त्रासामुळे विद्यार्थी, दुकानदार, शेतकरी आणि सर्वसामान्य नागरिकांचे मोठे नुकसान होत आहे.
जूनगावचे सरपंच श्री. राहुल भाऊ पाल यांनी या परिस्थितीवर तीव्र नाराजी व्यक्त करत महावितरणला थेट खडसावले आहे. त्यांनी म्हटले की, “पावसाळा अद्याप सुरू झालेला नाही, वारेसुद्धा नाहीत, तरीही तासन्‌तास वीज गायब राहते. ही नागरिकांची थट्टा आहे. विद्यार्थ्यांचे अभ्यास बिघडत आहेत आणि शेतकऱ्यांचे तसेच व्यापाऱ्यांचे कामकाज पूर्णपणे ठप्प होत आहे.”
या वाढत्या त्रासामुळे नागरिकांनी आता महावितरणवर हल्लाबोल करण्याचा इशारा दिला आहे. वेळेत वीजपुरवठा सुरळीत न केल्यास, लोक आंदोलनाच्या मार्गावर जाण्याची शक्यता आहे.
दरारा 24 तास न्यूज नेटवर्कच्या प्रतिनिधीने पाहणी केली असता, पोंभुर्णा, जूनगाव व परिसरातील अनेक भागांत वीजपुरवठा दिवसातून अनेक वेळा खंडित होत असल्याचे निदर्शनास आले. वीज नसल्यामुळे पाण्याचा पुरवठाही अडचणीत आला आहे, त्यामुळे लोकांना पिण्याच्या पाण्यासाठीही धावपळ करावी लागत आहे.
नागरिकांनी प्रशासनाकडे मागणी केली आहे की, वीजपुरवठा सुरळीत करावा, अन्यथा लोकशाही मार्गाने तीव्र आंदोलन छेडले जाईल.
वार्ताहर – दरारा 24 तास न्यूज नेटवर्क, पोंभुर्णा
www.darara24news.com
0 टिप्पण्या
Thanks for reading