सिरोंचा पुलाचे काम रखडले; नागरिक त्रस्त, प्रशासनाकडे तात्काळ लक्ष देण्याची मागणी

daraara 24 taas ७/०२/२०२५ ०२:२०:०० AM

सिरोंचा पुलाचे काम रखडले; नागरिक त्रस्त, प्रशासनाकडे तात्काळ लक्ष देण्याची मागणी

तालुका – अहेरी |मनोज गेडाम प्रतिनिधी – दरारा 24 तास न्यूज नेटवर्क

अहेरी तालुक्यातील आलापल्ली-येशील-सिरोंचा मार्गावर वर्धा नदीवर बांधण्यात येणाऱ्या प्रसिद्ध सिरोंचा पुलाचे काम गेल्या अनेक महिन्यांपासून रखडले आहे. परिणामी, या भागातील नागरिकांना, शेतकऱ्यांना आणि विद्यार्थ्यांना मोठ्या अडचणींचा सामना करावा लागत आहे. पावसाळा सुरु झाल्याने ही स्थिती आणखी बिकट झाली असून रस्त्यावरून ये-जा करणे धोकादायक झाले आहे.

स्थानिक लोकांच्या म्हणण्यानुसार, काँट्रॅक्टरकडून कामात अत्यंत दुर्लक्ष होत आहे. पुलाच्या दोन्ही टोकांवर केवळ प्लास्टिकच्या पट्ट्या लावून जागा बंद करण्यात आली असून, सुरक्षेच्या कोणत्याही उपाययोजना दिसून येत नाहीत. रस्त्यावरील काही भागांमध्ये केवळ माती टाकून "अरुंद रस्ता" बनविण्यात आला आहे. त्यामुळे दुचाकी वाहनधारकांचा जीव धोक्यात येतो आहे.

शेतकरी आणि विद्यार्थ्यांची परिस्थिती अधिकच गंभीर

या मार्गावरून शेतकरी आलापल्ली बाजारात ट्रॅक्टरद्वारे माल पोहचवतात. मात्र, रस्त्याची दुरवस्था आणि पुलाच्या कामामुळे डिझेल, खत आणि बी-बियाण्यांची वाहतूक खोळंबते आहे.
त्याचप्रमाणे, शालेय विद्यार्थी आलापल्ली येथे शिक्षणासाठी दररोज प्रवास करतात. रस्त्यांची ही स्थिती विद्यार्थ्यांच्या सुरक्षिततेवर प्रश्नचिन्ह निर्माण करत आहे.

प्रशासनाच्या भूमिकेवर प्रश्नचिन्ह

स्थानिक नागरिकांनी याबाबत वरिष्ठ अभियंते, कनिष्ठ अभियंते व प्रकल्प व्यवस्थापकांकडे अनेक वेळा विचारणा केली. मात्र, "इस्टीमेट बदलले जात आहे", "काम लवकरच सुरू होईल" अशा टोलवाटोलवीच्या उत्तरांखेरीज काहीही हाती लागले नाही.

"स्वामी समर्थ सिरोंचा पुलियाबिज" या ठेकेदार कंपनीकडून कामाच्या दर्जाबाबत गंभीर प्रश्न उपस्थित होत आहेत. काही ठिकाणी सिमेंटचे पिलर अपूर्ण आहेत आणि सुरक्षेचे कोणतेही संकेत चिन्हे लावलेली नाहीत.

जनतेची शासनाकडे मागणी

या रस्त्यावरून आलापल्लीपासून ते उभानूरपर्यंत चौदा गावे जोडली गेलेली असून, हजारो नागरिक दररोज या मार्गाचा वापर करतात.
स्थानिक ग्रामस्थांनी शासनाकडे आणि लोकप्रतिनिधींकडे तत्काळ हस्तक्षेप करून पुलाचे काम पूर्ण करण्याची मागणी केली आहे.

“रोज या रस्त्याने प्रवास करताना जीव मुठीत धरावा लागतो. किती दिवस असे धोके पत्करायचे?” असा सवाल नागरिक उपस्थित करत आहेत.