पाणी प्रश्नावर नगराध्यक्षा व उपाध्यक्ष यांनी राजीनामा द्यावा – विरोधकांची मागणी

✍️ वैनगंगा न्यूज लाईव्ह नेटवर्क | पोंभूर्णा

पोंभूर्णा नगर पंचायत क्षेत्रात गेल्या १० दिवसांपासून नळ पाणीपुरवठा ठप्प आहे. पावसाळ्याच्या मध्यभागी असतानाही नागरिकांना तहान भागवण्यासाठी विहिरी, हंडाभर पाणी किंवा बोअरवेलवर अवलंबून राहावे लागत आहे. यामुळे नगर प्रशासनाविरुद्ध नागरिकांचा तीव्र रोष निर्माण झाला असून, विरोधी नगरसेवकांनी थेट नगराध्यक्षा व उपाध्यक्ष यांनी राजीनामा द्यावा, अशी मागणी केली आहे.

पत्रकार परिषदेत मांडला रोष

या संदर्भात आज घेण्यात आलेल्या पत्रकार परिषदेत विरोधी नगरसेवकांनी प्रशासनावर सडकून टीका केली. “कर वसुली मात्र सक्तीने करता, मग पाणी का देत नाही?” असा सवाल त्यांनी उपस्थित केला.

२०१७ मधील कोट्यवधींची कामे ‘पाण्यात’

सन २०१७ मध्ये नगर पंचायत क्षेत्रातील पाणी पुरवठा योजनेसाठी तब्बल ११ कोटींची कामे करण्यात आली होती. यात –

पाईप लाईन टाकणे,
२ लाख लिटर क्षमतेची टाकी उभारणे,
नवीन नळ कनेक्शन,
घाटकुळ ते पोंभूर्णा पर्यंत १२ कि.मी. पाईपलाईन घालणे

अशा मोठ्या कामांचा समावेश होता. तरीही फक्त एका लिकेज दुरुस्तीसाठी प्रशासनाला १० दिवस लागणे हे धक्कादायक असल्याचे नागरिक सांगत आहेत.

२०२५ मध्येही १ कोटी ८ लाख खर्च, तरीही नागरिकांना पाणी नाही

यावर्षी पुन्हा १ कोटी ८ लाख रुपयांची कामे पाणी पुरवठा योजनेसाठी करण्यात आली. मात्र सदर योजना प्रत्यक्षात कुचकामी ठरली आहे.

आंदोलनाची चेतावणी

पत्रकार परिषदेत विरोधी नगरसेवकांनी स्पष्ट इशारा दिला की –
👉 जर तातडीने पाणी पुरवठा सुरळीत झाला नाही,
👉 तर नगर पंचायत कार्यालयासमोर आंदोलन उभारले जाईल.
👉 आणि या आंदोलनातून उद्भवणाऱ्या अनुचित घटनेसाठी नगर प्रशासन जबाबदार राहील.

विरोधकांचा ठाम आवाज

पत्रकार परिषदेत विरोधी नगरसेवक गणेश वासलवार, अतुल वाकडे, अभय बद्दलवर आणि नंदु बुरांडे यांनी संयुक्त निवेदनाद्वारे स्पष्ट केले की,
“शहरातील पाणीटंचाई ही नगर प्रशासनाच्या कुचकामी धोरणांची परिणती आहे. नागरिकांना नळाचे पाणी न मिळाल्यास नगराध्यक्ष व उपाध्यक्ष यांनी तात्काळ राजीनामा द्यावा.