📱 “विद्यार्थ्यांनी ए.आय. व चॅटजीपीटीचा वापर विधायक गोष्टींसाठी करावा” – सायबर तज्ञ अॅड. चैतन्य भंडारी

 ✍️ दरारा 24 तास न्यूज नेटवर्क 

---

✍️ जगदीश का. काशिकर
(मुक्त पत्रकार व गुंतवणूक/रोजगार-नोकरी/कामगार समस्या/कायदे सल्लागार)
मुंबई, महाराष्ट्र | व्हॉट्सअॅप – ९७६८४२५७५७

धुळे : एस.एस.व्ही.पी.एस. कॉलेज बापूसाहेब देवरे इंजिनियरिंग कॉलेज, धुळे येथे विद्यार्थ्यांसाठी सायबर जनजागृती व सुरक्षा या विषयावर विशेष मार्गदर्शन कार्यक्रम आयोजित करण्यात आला. या कार्यक्रमात प्रमुख वक्ते म्हणून सुप्रसिद्ध सायबर तज्ञ अॅड. चैतन्य भंडारी यांना आमंत्रित करण्यात आले होते.

कार्यक्रमादरम्यान अॅड. भंडारी यांनी विद्यार्थ्यांना मार्गदर्शन करताना मोबाईलच्या अतिरेकी वापराबाबत गंभीर इशारा दिला. त्यांनी सांगितले की, “आजकाल मोबाईल अॅडिक्शन विद्यार्थ्यांमध्ये मोठ्या प्रमाणात वाढत आहे. त्याचा परिणाम थेट त्यांच्या अभ्यासावर होत असून, नकळत ते अनेकदा सायबर फ्रॉडच्या जाळ्यात अडकतात. कारण मोबाईल अॅडिक्शन आणि सायबर गुन्हे हे एकमेकांशी घट्टपणे जोडलेले आहेत. त्यामुळे जर सायबर फ्रॉड रोखायचा असेल, तर सर्वप्रथम मोबाईल व्यसनावर नियंत्रण ठेवणे अत्यावश्यक आहे.”

यावेळी त्यांनी विद्यार्थ्यांना आर्टिफिशियल इंटेलिजन्स (AI) व चॅटजीपीटीसारख्या नव्या तंत्रज्ञानाविषयीही मार्गदर्शन केले. त्यांनी सांगितले की, “आज सोशल मीडियावर ए.आय. व चॅटजीपीटीचा दुरुपयोग मोठ्या प्रमाणात दिसून येतो. मात्र हे तंत्रज्ञान योग्य पद्धतीने वापरले, तर अभ्यास, संशोधन, करिअर नियोजन, प्रोजेक्ट वर्क आणि नवीन कौशल्य विकसित करण्यासाठी अत्यंत उपयुक्त ठरू शकते. त्यामुळे विद्यार्थ्यांनी या साधनांचा वापर चुकीच्या हेतूसाठी न करता फक्त चांगल्या आणि विधायक गोष्टींसाठी करणे गरजेचे आहे.”

अॅड. भंडारी यांनी पुढे सांगितले की केंद्र व राज्य शासनाकडून वेळोवेळी नवी सायबर सुरक्षा साधने व उपाययोजना उपलब्ध करून दिली जात आहेत. विद्यार्थ्यांनी आणि युवकांनी या टूल्सविषयी सजग राहून त्यांचा वापर करणे आवश्यक असल्याचे त्यांनी स्पष्ट केले.

या कार्यक्रमाला कॉलेजचे प्राचार्य, प्राध्यापक, अधिकारी व मोठ्या संख्येने विद्यार्थी उपस्थित होते. कार्यक्रमाचे आयोजन यशस्वीरीत्या पूर्ण करून विद्यार्थ्यांमध्ये सायबर जनजागृतीचा महत्वाचा संदेश पोहोचवण्यात आला.

---

👉