🐅 सावली वनपरिक्षेत्रातील मोठी कारवाई — एक वाघीण व तीन बछडे जेरबंद!

daraara 24 taas ११/११/२०२५ ०६:४५:०० AM

🐅 सावली वनपरिक्षेत्रातील मोठी कारवाई — एक वाघीण व तीन बछडे जेरबंद!

दरारा 24 तास न्यूज नेटवर्क
सावली (ता. 11 नोव्हेंबर)

सावली तालुक्यातील व्याहाड उपक्षेत्र व उमरी नियतक्षेत्रातील मौजा डोनाडा व गवारला परिसरात गेल्या वर्षभरापासून दहशत माजवणाऱ्या एका वाघीणीसह तिचे तीन बछडे यांना अखेर वन विभागाने जेरबंद करण्यात यश मिळविले आहे. ही अत्यंत नियोजनबद्ध आणि धाडसी कारवाई वन अधिकाऱ्यांच्या मार्गदर्शनाखाली पार पडली असून स्थानिक ग्रामस्थांनी दिलासा व्यक्त केला आहे.

मिळालेल्या माहितीनुसार, F-4 वाघीण व तिचे अंदाजे 18 ते 20 महिन्यांचे तीन बछडे गेल्या काही महिन्यांपासून डोनाडा व गवारला जंगल परिसरात वारंवार दिसत होते. परिसरात धान कापणीचा हंगाम सुरू असल्याने नागरिकांमध्ये भीतीचे वातावरण निर्माण झाले होते. ग्रामस्थांनी वारंवार वन विभागाकडे वाघांना पकडण्याची मागणी केली होती.

त्या पार्श्वभूमीवर वन विभागाने राज्याचे प्रधान मुख्य वनसंरक्षक (वन्यजीव) तथा मुख्य वन्यजीव रक्षक यांच्या परवानगीने दिनांक 24 ऑक्टोबर 2025 रोजी जेरबंदीचा प्रस्ताव मंजूर केला. त्यानुसार 9 नोव्हेंबर रोजी सायंकाळी दोन बछडे तर 10 नोव्हेंबर रोजी सायंकाळी वाघीण आणि आणखी एक बछडा असे एकूण चार वाघ (एक वाघीण व तीन बछडे) सुरक्षितरीत्या जेरबंद करण्यात आले.

ही मोहीम श्री. रामानुजम आर. एम. (भा.व.से.) यांच्या मार्गदर्शनाखाली व श्री. राजन तलमले, विभागीय वन अधिकारी, चंद्रपूर वनविभाग तसेच श्री. विकास तरसे, सहायक वनसंरक्षक यांच्या नेतृत्वात पार पडली.
या कारवाईत श्री. विनोद धुर्वे, वनपरिक्षेत्र अधिकारी सावली आणि श्री. दत्ता जाधव, परिविक्षाधीन वनपरिक्षेत्र अधिकारी यांच्या चमूने अत्यंत संयम, कौशल्य आणि तांत्रिक दक्षता दाखवत कारवाई यशस्वी केली.

या मोहिमेत श्री. घनश्याम नायगमकर, वनपरिक्षेत्र अधिकारी चंद्रपूर, डॉ. कुंदन पोडचेलवार, पशुधन विकास अधिकारी, TTC चंद्रपूर, श्री. अक्षय नारनवरे, जीवशास्त्रज्ञ, चंद्रपूर वनविभाग तसेच RRU टीम, चंद्रपूर वनविभाग यांनी विशेष सहकार्य केले.

तसेच क्षेत्र सहाय्यक श्री. अनंत राखुंडे (व्याहाड), श्री. पाटील, श्री. मेश्राम, श्री. सिडाम, वनरक्षक श्री. मुंडे, श्री. सोनकर, श्री. खुडे, श्री. डांगे, श्री. आखाडे, श्री. बोनलवार, श्री. अहिरकर, श्री. इंगळे, श्री. कराड, श्री. मुरकुटे, श्री. नागोसे, श्री. बोरकर तसेच PRT चमू डोनाडा, गवारला, हरंबा, उपरी बीट मदतनीस यांनी मोलाचे योगदान दिले.