सौ. सिंधलताई राठोड आदिवासी आश्रम शाळेत स्व. सुधाकरराव राठोड यांना भावपूर्ण अभिवादन
नांदगाव, ता. मूल, जि. चंद्रपूर
आदिवासी समाजाच्या शिक्षणासाठी आपले संपूर्ण आयुष्य वेचणाऱ्या थोर शिक्षण महर्षीला कृतज्ञतेने स्मरण करण्याचा हृदयस्पर्शी सोहळा आज नांदगाव येथे पार पडला.
श्री. सुधाकरराव राठोड शिक्षण संस्था शेलावाडा ता. अहेरी जि. गडचिरोली चे संस्थापक आणि सौ. सिंधलताई राठोड आदिवासी आश्रमशाळा नांदगाव ता. मूल जि. चंद्रपूर चे प्रेरणास्थान स्व. सुधाकरराव ताराचंद राठोड यांच्या जयंती निमित्त विनम्र अभिवादन कार्यक्रमाचे आयोजन करण्यात आले होते.
कार्यक्रमाच्या प्रारंभी स्व. सुधाकरराव राठोड यांच्या प्रतिमेला पुष्पहार अर्पण करून दीपप्रज्वलन करण्यात आले. यावेळी उपस्थित मान्यवरांनी त्यांच्या कार्याचा गौरवपूर्ण उल्लेख करत भावना व्यक्त केल्या.
"स्व. सुधाकरराव राठोड यांनी केवळ शाळा उभी केली नाही, तर जंगल-पाड्यावरच्या आदिवासी मुलांच्या हातात शिक्षणरूपी मशाल दिली. आज ही आश्रमशाळा जे ज्ञानदानाचे कार्य करीत आहे, तो त्यांच्या त्यागाचा आणि दूरदृष्टीचा जिवंत दीपस्तंभ आहे," असे प्रतिपादन यावेळी मान्यवरांनी केले.
त्यांनी प्रतिकूल परिस्थितीत शिक्षण संस्थेची मुहूर्तमेढ रोवून शेकडो आदिवासी विद्यार्थ्यांचे भविष्य घडविले. त्यांचे शिक्षणाप्रती असलेले समर्पण आणि समाजसेवेचा वसा आजही सर्वांसाठी प्रेरणादायी आहे.
या अभिवादन कार्यक्रमाला प्रमुख पाहुणे म्हणून पोंभुर्णा तालुका पत्रकार संघाचे अध्यक्ष मान. रुपेश निमसरकार, कार्याध्यक्ष जीवनदास गेडाम, दैनिक लोकशाही वार्ता चे बल्लारपूर तालुका प्रतिनिधी प्रशांत रणदिवे यांची प्रमुख उपस्थिती होती.
तसेच शाळेचे मुख्याध्यापक व प्राचार्य संतोष बक्षीस सर, रुस्तम चव्हाण सर, राठोड सर यांच्यासह सर्व शिक्षक व शिक्षकेतर कर्मचारी मोठ्या संख्येने उपस्थित होते.
कार्यक्रम अत्यंत शिस्तबद्ध आणि भावनिक वातावरणात पार पडला. विद्यार्थ्यांनी देखील आपल्या गुरूला आदरांजली वाहिली. शेवटी उपस्थितांचे आभार मुख्याध्यापकांनी मानले.
0 टिप्पण्या
Thanks for reading