विजय जाधव/ प्रतिनिधी=
नांदगाव, ता. ५ मे:
नांदगाव, जुनगाव, घोसरी, देवाडा बुज आणि आसपासच्या गावांमध्ये सध्या एक अत्यंत गंभीर समस्या उद्भवली आहे. थोडासा जरी वारा किंवा हलकासा पाऊस पडला, तरी या भागातील वीजपुरवठा तासन्‌तास खंडित होतो. परिणामी, गावातील सामान्य जनतेपासून शेतकरी, विद्यार्थी आणि व्यावसायिक वर्ग हैराण झाले आहेत.
सध्या वीजपुरवठा सुरळीत करण्यासाठी कोणतेही ठोस पावले उचलण्यात आलेली नाहीत. त्यामुळे नागरिकांमध्ये प्रचंड नाराजी पसरलेली आहे.
गावकऱ्यांच्या मते, वीज वितरण यंत्रणा अतिशय जीर्ण अवस्थेत आहे. अनेक ठिकाणी वीज वाहिन्यांवर झाडांच्या फांद्या अडथळा निर्माण करतात. काही भागांत खांब मोडकळीस आलेले असून, वायरिंगही अतिशय जुनी व कमकुवत आहे. त्यामुळे हवामानात थोडासा बदल झाला तरी वीज बंद होते आणि दीर्घकाळ येत नाही.
विद्यार्थ्यांचे शिक्षण, शेतकऱ्यांचे पाणीपुरवठ्यावर परिणाम
वीज नसल्यानं ऑनलाइन शिक्षण, संगणक प्रशिक्षण, पिठाच्या गिरण्या, पाणी पंप, दूध थंडगारणी केंद्रे इत्यादी सेवा ठप्प होतात. पावसाळ्याच्या तोंडावर ही समस्या अधिक गंभीर बनणार आहे, असा अंदाज ग्रामस्थांनी व्यक्त केला आहे.
महावितरणकडून दुर्लक्ष?
या भागातील नागरिकांनी अनेक वेळा महावितरण कार्यालयात तक्रारी नोंदवल्या आहेत. मात्र, या समस्यांकडे कायमच दुर्लक्ष केले जात असल्याचे ग्रामस्थांचे म्हणणे आहे. वेळोवेळी तक्रारी करूनही यंत्रणेची देखभाल व अद्ययावत कामे केली जात नसल्यामुळे ही अडचण कायमची झाली आहे.
जनतेचा संताप उफाळला
गावकऱ्यांनी आता ठरवले आहे की जर त्वरित उपाययोजना न झाल्या, तर ग्रामसभा आयोजित करून सार्वजनिक आंदोलन छेडण्यात येईल. तसेच संबंधित वरिष्ठ अधिकाऱ्यांना लेखी निवेदन देण्यात येणार असल्याची माहिती मिळाली आहे.
निवेदनाची तयारी सुरू
या संदर्भात गावातील सामाजिक कार्यकर्ते आणि तरुण मंडळी एकत्र येऊन निवेदन तयार करत असून, लवकरच महसूल आणि वीज विभागाकडे पाठवले जाणार आहे.
---
0 टिप्पण्या
Thanks for reading