🔴 ग्रामसेवक लाच घेताना रंगेहाथ अटक — एसीबीची मोठी कारवाई भायगाव ग्रामपंचायतीत!

---

🔴 

छत्रपती संभाजीनगर (वैजापूर):
भायगाव ग्रामपंचायतीतील ग्रामसेवक विजयकुमार क्षीरसागर याला आज (बुधवार) दुपारी जरूळ फाटा येथे लाचलुचपत प्रतिबंधक विभागाच्या पथकाने १०,००० रुपयांची लाच घेताना रंगेहाथ अटक केली.

तक्रारदार हे भायगावचे उपसरपंच असून त्यांच्या गावातील स्मशानभूमीचे काम जनसुविधा योजनेअंतर्गत पूर्ण झाले आहे. या कामासाठी मंजूर झालेल्या ₹६.९६ लाखांपैकी उर्वरित ₹९४ हजार रुपये अदा करण्यासाठी आवश्यक एनओसी त्यांनी ग्रामपंचायतीत सादर केली होती. मात्र ग्रामसेवक क्षीरसागर याने उर्वरित रकमेसाठी चेकवर सही करण्याच्या मोबदल्यात ₹१५ हजार लाचेची मागणी केली.

तक्रारदाराने लाच देण्यास नकार देत थेट छत्रपती संभाजीनगर एसीबी कार्यालयात धाव घेतली. प्राथमिक पडताळणी १७ जून रोजी झाली. १८ जून रोजी पंचासमवेत चर्चेदरम्यान आरोपीने १० हजार रुपयांवर तडजोड करत लाच मागितल्याचे स्पष्ट झाले.

त्यानुसार, आज तक्रारदाराने आरोपीच्या सांगण्यानुसार जरूळ फाट्यावरील चैतन्य टी हाऊस येथे त्याला भेट दिली आणि पंचासमक्ष ₹१०,००० रुपये दिले. क्षीरसागर लाच स्वीकारताच एसीबीच्या पथकाने त्याला रंगेहाथ अटक केली.

कारवाईदरम्यान आरोपीकडून मोबाईल, पाकीट, ओळखपत्रे, ₹७०० रोख रक्कम आणि दुचाकीची चावी जप्त करण्यात आली. त्याच्यावर भ्रष्टाचार प्रतिबंधक अधिनियम १९८८ च्या कलम ७ अंतर्गत गुन्हा दाखल करण्याची प्रक्रिया सुरू आहे.

ही कारवाई पोलीस अधीक्षक संदीप आटोळे, अपर पोलीस अधीक्षक मुकुंद अघाव, पो. उप अधीक्षक सुरेश नाईकनवरे यांच्या मार्गदर्शनाखाली, पोलीस उपाधीक्षक संगीता पाटील यांच्या नेतृत्वात पोह. राजेंद्र सिनकर, पोअं. विलास चव्हाण व सी.एन. बागुल यांच्या पथकाने केली.

---