ई-पीक पाहणी मोहिमेला 1 ऑगस्टपासून सुरुवात – शेतकऱ्यांना 14 सप्टेंबरपूर्वी नोंदणीचे आवाहन

📰 ई-पीक पाहणी मोहिमेला 1 ऑगस्टपासून सुरुवात – शेतकऱ्यांना 14 सप्टेंबरपूर्वी नोंदणीचे आवाहन

पोंभुर्णा (प्रतिनिधी) – खरीप हंगाम 2025 साठी राज्य शासनाच्या निर्देशानुसार ई-पीक पाहणी प्रकल्पाची अंमलबजावणी 1 ऑगस्ट 2025 पासून सुरू होत आहे. पोंभुर्णा तालुक्यातील सर्व शेतकरी बांधवांना तहसील प्रशासनामार्फत आवाहन करण्यात आले आहे की, त्यांनी आपल्या 7/12 उताऱ्यावर नमूद असलेल्या शेतजमिनीवरील खरीप पिकांची डिजिटल नोंद ई-पीक पाहणी DCS मोबाईल ॲप (व्हर्जन 4.0.0) च्या मदतीने 1 ऑगस्ट ते 14 सप्टेंबर 2025 या कालावधीत पूर्ण करावी.

📌 ई-पीक पाहणीचे महत्त्व व फायदे:

शेतकऱ्यांना पीक विमा, नैसर्गिक आपत्तीतील नुकसानभरपाई, शासकीय अनुदाने यांसारख्या योजनांचा लाभ मिळण्यासाठी आवश्यक

पीक उत्पादनाचा अचूक अंदाज मिळवून कृषी धोरणे व पुरवठा साखळी व्यवस्थापन सुधारते

शेतीसंबंधी योजनांमध्ये पारदर्शकता व तत्पर कार्यवाही सुनिश्चित होते

मोबाईलवरूनच पीक नोंदणी करण्याची सुविधा, वेळेची बचत आणि पूर्ण नियंत्रण

तहसीलदार कार्यालयाने सांगितले की, ई-पीक पाहणी करताना कोणतीही अडचण आल्यास गावातील नियुक्त पीक पाहणी सहाय्यक, महसूल सेवक किंवा ग्राम महसूल अधिकाऱ्यांची मदत घ्यावी.

तसेच, सहाय्यक स्तरावरील पीक पाहणी 15 सप्टेंबर ते 29 ऑक्टोबर 2025 या कालावधीत केली जाणार आहे. परंतु शेतकऱ्यांनी शक्य तितकी नोंद स्वतः पूर्ण करून "स्वावलंबी शेतकरी" हा आदर्श प्रस्थापित करण्याचे आवाहन तहसील प्रशासनाने केले आहे.

–