📰 दरारा 24 तास न्यूज नेटवर्क
ई-पीक पाहणी – खरीप हंगाम 2025 : शेतकऱ्यांना तातडीचे आवाहन
पोंभुर्णा तालुका प्रशासनाचा पुढाकार
पोंभुर्णा : (दि. 6 सप्टेंबर 2025)
राज्य शासनाच्या आदेशानुसार खरीप हंगाम 2025 करिता ई-पीक पाहणी प्रकल्प 1 ऑगस्टपासून सुरू करण्यात आला आहे. शेतकऱ्यांनी आपल्या 7/12 उताऱ्यावर नमूद शेतजमिनीवरील खरीप पिकांची डिजिटल नोंद E-Peek Pahani DCS मोबाईल ॲप (व्हर्जन 4.0.0) च्या माध्यमातून 14 सप्टेंबर 2025 पर्यंत पूर्ण करणे बंधनकारक आहे.
मात्र, पोंभुर्णा तालुक्यातील ई-पीक पाहणीची प्रगती फक्त 30 टक्के इतकीच झाल्याचे समोर आले आहे. शासनाच्या निर्देशांनुसार हे काम तातडीने पूर्ण करण्यासाठी महसूल प्रशासनाने विशेष उपाययोजना आखल्या आहेत.
ठरविण्यात आलेल्या उपाययोजना :
- तालुक्यात कॅम्प मोडमध्ये विशेष मोहिम राबविण्यात येणार.
- महसूल मंडळ अधिकारी, तलाठी, ग्राम महसूल अधिकारी व नियुक्त पीक पाहणी सहाय्यक यांच्या समन्वयातून तीन दिवसांत ई-पीक पाहणीचे उद्दिष्ट पूर्ण केले जाणार.
- शेतकऱ्यांनी आपल्या पिकांची नोंद स्वतःच्या मोबाईलद्वारे किंवा कॅम्प ठिकाणी प्रत्यक्ष जाऊन करावी.
- तांत्रिक अडचणी आल्यास महसूल प्रशासनातील अधिकारी, कर्मचारी व नियुक्त सहाय्यकांकडून मदत मिळेल.
ई-पीक पाहणीचे महत्त्व :
- शासनाच्या योजनांचा लाभ : पीक विमा, नैसर्गिक आपत्तीतील नुकसानभरपाई, अनुदान योजना.
- अचूक माहिती व नियोजन : उत्पादनाचा अंदाज, कृषी धोरणे, पुरवठा साखळी व्यवस्थापन.
- पारदर्शकता : कृषी व महसूल विभागाच्या योजना अधिक वेगाने व सुलभ रितीने.
- स्वावलंबन : मोबाईलद्वारे स्वतःच नोंदणी करण्याची सुविधा, वेळ व श्रमांची बचत.
शेतकऱ्यांसाठी महत्त्वाची सूचना :
👉 14 सप्टेंबर 2025 पूर्वी ई-पीक पाहणी पूर्ण करणे अनिवार्य आहे.
विलंब झाल्यास शेतकऱ्यांना योजनांचा लाभ मिळण्यात अडथळा येऊ शकतो.
📢 तहसीलदार, पोंभुर्णा यांनी तालुक्यातील सर्व शेतकरी बांधवांना आवाहन केले आहे की, शासनाच्या आदेशानुसार ई-पीक पाहणी तातडीने पूर्ण करून ‘स्वावलंबी शेतकरी’ हा आदर्श प्रस्थापित करावा.
0 टिप्पण्या
Thanks for reading