📰 शासकीय धान्याच्या अवैध विक्रीचा गंभीर प्रकार — युवासेनेचा प्रशासनावर हल्लाबोल!
वैनगंगा न्यूज लाईव्ह नेटवर्क | दरारा 24 तास न्यूज नेटवर्क
पोंभुर्णा तालुक्यात शासकीय धान्याच्या अवैध विक्रीचा धक्कादायक प्रकार उघड झाल्याने प्रशासनाच्या कार्यप्रणालीवर प्रश्नचिन्ह निर्माण झाले आहे. घटनेच्या ठिकाणी तहसील कार्यालयातील अन्नपुरवठा विभागाच्या I.O. मॅडम प्रत्यक्ष उपस्थित असतानाही कोणतीही ठोस कारवाई न झाल्याने स्थानिक नागरिकांमध्ये तसेच युवासेनेत प्रचंड संताप निर्माण झाला आहे.
मिळालेल्या माहितीनुसार, संशयास्पद वाहनातून शासनाचं धान्य वाहतूक होत असल्याची माहिती स्थानिकांना मिळाली. घटनास्थळी पोहोचलेल्या संबंधित अधिकाऱ्यांनी वाहन तपासणी केली असता ते धान्य शासनाच्या गोदामातील असल्याचं स्पष्ट दिसून आलं. मात्र, काही वेळानंतर बनावट मिलिंग पावती दाखवून ती गाडी सोडण्यात आल्याची चर्चा सर्वत्र सुरु आहे. या घडामोडींमुळे संबंधित अधिकारी आणि धान्य विक्री करणारे यांच्यातील संगनमताचा संशय अधिकच गडद झाला आहे.
या पार्श्वभूमीवर युवासेना शहर प्रमुख महेश श्रीगिरीवार यांनी प्रशासनावर जोरदार हल्लाबोल करत तीव्र नाराजी व्यक्त केली आहे. त्यांनी स्पष्ट शब्दांत सांगितले की —
“शासनाच्या अन्नसुरक्षा योजनेंतर्गत गरीब आणि गरजू नागरिकांसाठी असलेलं धान्य खुलेपणाने विकलं जात आहे. अधिकारी केवळ दर्शनी तपासणी करून गप्प बसतात. ही केवळ बेफिकिरी नाही तर प्रशासनातील भ्रष्टाचाराचं जिवंत उदाहरण आहे. युवासेना यावर गप्प बसणार नाही.”
श्रीगिरीवार यांनी पुढे सांगितले की, संबंधित अधिकारी आणि जबाबदार व्यक्तींवर तात्काळ चौकशी करून कठोर कारवाई झाली पाहिजे. अन्यथा युवासेना रस्त्यावर उतरून तीव्र आंदोलन उभारेल, असा इशारा त्यांनी दिला आहे.
सध्या या घटनेमुळे पोंभुर्णा तालुक्यात संतापाचे वातावरण असून, नागरिक आणि सामाजिक संघटना देखील याप्रकरणात पारदर्शक चौकशीची मागणी करत आहेत. प्रशासनाने या गंभीर प्रकरणाकडे गांभीर्याने लक्ष देऊन दोषींवर कठोर कारवाई करावी, अशी जनतेची अपेक्षा आहे.
✍️ वैनगंगा न्यूज लाईव्ह नेटवर्क — करारात 24 तास न्यूज नेटवर्क
0 टिप्पण्या
Thanks for reading