दरारा 24 तास न्यूज नेटवर्क
मुल तालुका प्रतिनिधी
रेती माफियाचा दहशतवाद : सामाजिक कार्यकर्ते वैभव पिंपळशेंडे यांना फोनवरून जिवे मारण्याची धमकी ; आरोपी शिवा कोरेवार विरोधात गुन्हा दाखल
मुल | 1 डिसेंबर 2025
पोंभुर्णा तालुक्यातील चेकठाणेवासना येथील प्रखर सामाजिक कार्यकर्ते व शासकीय कंत्राटदार वैभव कुशाबराव पिंपळशेंडे यांना फोनवरून उघडपणे जिवे मारण्याची धमकी देण्यात आली असून, या प्रकरणी रेती तस्कर शिवा कोरेवार यांच्या विरोधात मुल पोलिस स्टेशनमध्ये गुन्हा दाखल करण्यात आला आहे.
या घटनेमुळे प्रशासनामध्ये खळबळ उडाली असून, लोकप्रतिनिधी व नागरिकांमध्ये एखाद्याने आवाज उठवला तर त्याला अशा धमक्या मिळतात हे चिंताजनक असल्याचे मत व्यक्त केले जात आहे.
जनतेच्या प्रश्नांसाठी लढणाऱ्या कार्यकर्त्याला धमकी
वैभव पिंपळशेंडे हे भ्रष्टाचारविरोधी आंदोलन, शेतकऱ्यांच्या समस्या, युवकांना रोजगार, अवैध धंद्यांविरोधातील लढा आणि शासनाच्या निर्णयांवरील तर्कशील टीका यांसाठी ओळखले जातात. स्थानिक राजकारणात आणि अवैध रेती उत्खनन विरोधातील त्यांच्या कणखर भूमिकेमुळे काही हितसंबंधी गटांनी षडयंत्र रचल्याचा उल्लेख स्वतः पिंपळशेंडे यांनी तक्रारीत केला आहे.
धमकीची घटना कशी घडली?
तक्रारीनुसार, सोमवार 1 डिसेंबर रोजी सायंकाळी 7:49 वाजता पिंपळशेंडे हे मित्रांसह मुल येथील शिवार हॉटेलमध्ये भोजनासाठी गेले असताना
चंद्रपूर येथील कुख्यात रेती तस्कर शिवा कोरेवार यांनी पिंपळशेंडे यांच्या मित्र अंशुल मोरे यांना फोन केला.
त्यांच्याशी बोलल्यानंतर फोन पिंपळशेंडेंना देण्यात आला, त्यावेळी कोरेवार याने अश्लील, अशोभनीय भाषेचा वापर करत उघड धमकी दिली—
“चंद्रपूरात आलास तर तुला तुझ्या कारसोबत पेटवून टाकीन आणि डोक्यात सहाच्या सहा गोळ्या घालीन”
या खुनाच्या इशाऱ्यामुळे पिंपळशेंडे यांनी हल्ला होण्याची भीती व्यक्त केली आहे आणि आरोपीविरुद्ध लगेच प्रतिबंधात्मक कारवाई करण्याची मागणी केली आहे.
प्रशासनाची कसोटी – काय कारवाई होते?
अवैध रेती उपसा हा परिसरातील अब्जावधी रुपयांचा काळा व्यवसाय ठरला असून, त्याविरोधात बोलणाऱ्यांना धमकावणे, दहशत निर्माण करणे आणि हल्ले करणे ही नवीन बाब नाही.
प्रशासनाकडून अशा गुन्हेगारांना राजकीय संरक्षण मिळतंय का?
धमकी देणारा व्यक्ती पकडला जाईल का?
की प्रकरण थंड बस्त्यात जाईल?
अशा प्रश्नांवर सर्वसामान्य नागरिक आणि पत्रकारिता क्षेत्राचे लक्ष केंद्रित झाले आहे.
लोकशाहीत आवाज दडपण्याचा प्रयत्न अस्वीकार्य
ज्या देशात नागरिक आणि सामाजिक कार्यकर्त्यांना सत्य मोकळेपणाने बोलण्याची मुभा आहे, त्या लोकशाहीत गुंड आणि रेती माफिया हत्येच्या धमक्या देऊन दडपशाही करत असतील तर प्रशासनाने हे गंभीरपणे घेणे अत्यावश्यक ठरते.
पिंपळशेंडेंची मागणी
- आरोपी विरुद्ध कठोर कायदेशीर कारवाई
- प्रतिबंधात्मक कलमे लागू करणे
- त्यांच्या व कुटुंबाच्या सुरक्षेची तरतूद
- रेती तस्करीविरुद्ध मोठ्या स्तरावर विशेष मोहिम
दरारा 24 तासची मागणी
भ्रष्टाचार व अवैध धंद्यांना राजकीय संरक्षण देणारी साखळी मोडली गेली पाहिजे. कोणाच्याही आवाजाला धमक्यांनी दाबण्याचा प्रयत्न करणाऱ्यांवर तात्काळ कठोर कारवाई करण्यात यावी—हेच कायद्याचे राज्य!
या प्रकरणातील पुढील घडामोडींवर दरारा 24 तास न्यूज नेटवर्क लक्ष ठेवून आहे.
— संपादकीय विभाग
दरारा 24 तास न्यूज नेटवर्क
0 टिप्पण्या
Thanks for reading