गडचिरोलीत मक्का खरेदी केंद्रांची मागणी जोर धरली; शेतकऱ्यांना हमीभाव मिळवून देण्याची मागणी

daraara 24 taas ४/१३/२०२६ ०८:२९:०० PM

📰 दरारा 24 तास न्यूज नेटवर्क |

गडचिरोली, प्रतिनिधी : जिल्ह्यातील शेतकऱ्यांसाठी अत्यंत महत्त्वाची असलेली मक्का पिकाची समस्या सध्या तीव्र होत असून, शासनाच्या आधारभूत किंमत योजनेअंतर्गत मक्का खरेदी केंद्र तात्काळ सुरू करण्याची मागणी जोर धरत आहे.

महाराष्ट्र राज्य सहकारी पणन महासंघ मर्यादित चे संचालक श्री. अतुल गंगाधर गण्यारपवार यांनी यासंदर्भात जिल्हाधिकारी, गडचिरोली यांना निवेदन सादर केले आहे.

📌 उत्पादन मोठं, पण भाव कमी

गडचिरोली हा वनव्याप्त आणि आदिवासी बहुल जिल्हा असून येथे भात पिकानंतर मोठ्या प्रमाणावर मक्का पिकाची लागवड केली जाते. अंदाजे ५ लाख क्विंटल मक्का उत्पादन जिल्ह्यात होत आहे. मात्र, जिल्ह्यात मक्का प्रक्रिया (प्रोसेसिंग) उद्योग नसल्यामुळे शेतकऱ्यांना मोठ्या अडचणींचा सामना करावा लागत आहे.

📉 व्यापाऱ्यांकडून कमी दरात खरेदी

बाहेरील व्यापारी जिल्ह्यात येऊन मक्का केवळ ₹1600 ते ₹1700 प्रति क्विंटल दराने खरेदी करण्याचा प्रयत्न करत आहेत.
तर शासनाने निश्चित केलेला हमीभाव (MSP) ₹2400 प्रति क्विंटल आहे.

👉 यामुळे शेतकऱ्यांना प्रति क्विंटल सुमारे ₹800 नुकसान सहन करावे लागत आहे.

⚠️ उत्पादन खर्चही जास्त

खत, मजुरी, पाणी, औषधे आणि पेरणी यांसारख्या खर्चाचा विचार करता, सध्याचा हमीभावही अपुरा असल्याचे शेतकरी सांगत आहेत. अशा परिस्थितीत कमी दरात विक्री करणे शेतकऱ्यांसाठी आर्थिकदृष्ट्या घातक ठरत आहे.

🏢 खरेदी केंद्रांची तातडीची गरज

निवेदनात पुढील मागण्या करण्यात आल्या आहेत :

जिल्ह्यात जास्तीत जास्त मक्का खरेदी केंद्र तात्काळ मंजूर करावीत
५ लाख क्विंटल मक्का खरेदीसाठी सरकारी गोदामांची व्यवस्था करावी
गरज भासल्यास खाजगी गोदामे भाड्याने घेण्याचे आदेश द्यावेत
शेतकऱ्यांना ऑनलाइन नोंदणी (टोकन) करण्यासाठी तत्काळ सुविधा उपलब्ध करून द्यावी