गोंडपिपरी तालुक्यातील एमआयडीसी प्रकल्पाबाबत धम्मा निमगडे यांची मागणी “हंगाम सुरू होण्यापूर्वी भूमी अधिग्रहण प्रक्रिया तातडीने सुरू करा”

 

गोंडपिपरी तालुक्यातील एमआयडीसी प्रकल्पाबाबत धम्मा निमगडे यांची मागणी

“हंगाम सुरू होण्यापूर्वी भूमी अधिग्रहण प्रक्रिया तातडीने सुरू करा”

वैनगंगा न्यूज लाईव्ह नेटवर्क

गोंडपिपरी प्रतिनिधी :

गोंडपिपरी तालुक्यात प्रस्तावित एमआयडीसी प्रकल्पामुळे परिसरातील शेतकरी, भूमिपुत्र व नागरिकांच्या अपेक्षा उंचावल्या आहेत. या प्रकल्पामुळे तालुक्याच्या औद्योगिक विकासाला चालना मिळणार असली तरी भूमी अधिग्रहण प्रक्रियेत होणारा विलंब शेतकऱ्यांसाठी चिंतेचा विषय ठरत आहे.

याच पार्श्वभूमीवर सामाजिक कार्यकर्ते धम्मा निमगडे यांनी शासन व प्रशासनाकडे महत्त्वाची मागणी करत, “पावसाळी हंगाम सुरू होण्यापूर्वी भूमी अधिग्रहणाची प्रक्रिया तातडीने आरंभ करावी,” असे आवाहन केले आहे.

त्यांनी सांगितले की, सध्या शेतकरी खरीप हंगामाच्या तयारीत व्यस्त असून, पेरणीपूर्वीच जमीन अधिग्रहणाबाबत स्पष्टता मिळणे आवश्यक आहे. अन्यथा शेतकऱ्यांना आर्थिक नुकसान सहन करावे लागू शकते. जमीन मोजणी, पंचनामे, मोबदला निश्चिती आणि प्रशासकीय प्रक्रिया वेळेत पूर्ण न झाल्यास शेतकरी संभ्रमात राहतील, अशीही भीती त्यांनी व्यक्त केली.

धम्मा निमगडे यांनी पुढे म्हटले की, एमआयडीसीसारखे मोठे प्रकल्प तालुक्याच्या विकासासाठी आवश्यक असले तरी शेतकऱ्यांच्या हिताला प्राधान्य देणे तितकेच महत्त्वाचे आहे. भूमी अधिग्रहण प्रक्रिया पारदर्शक व न्याय्य पद्धतीने राबवून प्रभावित शेतकऱ्यांना योग्य मोबदला, पुनर्वसन व रोजगाराच्या संधी देण्यात याव्यात, अशी मागणीही त्यांनी केली.

दरम्यान, गोंडपिपरी तालुक्यातील नागरिकांचे लक्ष आता प्रशासनाच्या भूमिकेकडे लागले असून, एमआयडीसी प्रकल्पाच्या हालचालींना वेग मिळणार का, याकडे सर्वांचे लक्ष केंद्रित झाले आहे.