सावली परिक्षेत्रात 6 वर्षीय वाघाचा संशयास्पद मृत्यू, वनविभागाकडून सखोल तपास सुरू

दरारा 24 तास न्यूज नेटवर्क | चंद्रपूर

दिनांक: 30 जून .. चंद्रपूर: सावली परिक्षेत्रात 6 वर्षीय वाघाचा संशयास्पद मृत्यू, वनविभागाकडून सखोल तपास सुरू

*चंद्रपूर, मूल:* चंद्रपूर वनविभागाच्या सावली परिक्षेत्रात सोमवारी दुपारी एका प्रौढ वाघाचा मृतदेह आढळून आल्याने खळबळ उडाली आहे. मूल तालुक्यातील चिकली चक क्र. 2 येथील बिगर वनक्षेत्रात हा वाघ मृतावस्थेत आढळला. वाघाचे वय अंदाजे 6 ते 7 वर्षे असून तो नर असल्याची माहिती वनविभागाने दिली आहे.

सोमवार, 30 जून 2026 रोजी दुपारी 1:00 वाजण्याच्या सुमारास चितेगाव बिट, राजोली राऊंड अंतर्गत येणाऱ्या चिकली चक क्र. 2 मधील सर्व्हे नंबर 78 येथे स्थानिकांनी वाघाचा मृतदेह पाहिला. *GPS निर्देशांक N 20.142924, E 79.700332* या ठिकाणी हा मृतदेह आढळला. प्राथमिक अंदाजानुसार वाघाचा मृत्यू सुमारे 24 तासांपूर्वी झाला असावा.

घटनेची माहिती मिळताच वनविभागाचे वरिष्ठ अधिकारी व पशुवैद्यकीय तज्ज्ञांचे पथक घटनास्थळी दाखल झाले. यावेळी खालील अधिकारी उपस्थित होते:  

- *श्री. विकास तरसे* – सहाय्यक वनसंरक्षक, चंद्रपूर  

- *श्री. विनोद धुर्वे* – वनपरिक्षेत्र अधिकारी, सावली  

- *डॉ. विलास गवखरे* – सहायक आयुक्त, पशुचिकित्सालय मूल  

- *डॉ. कुंदन पोडचेलवार* – पशुधन विकास अधिकारी, TTC चंद्रपूर  

- *डॉ. आकाश गोमकाळे* – पशुधन विकास अधिकारी, बोथली  

- *श्री. मुकेश भांदककर* – प्रतिनिधी, WPSI  

- *श्री. राजू काहीलकर* – Eco प्रो, चंद्रपूर  

- *श्री. अक्षय नारनवरे* – बायोलॉजिस्ट, चंद्रपूर वनविभाग  

NTCA च्या प्रतिनिधींच्या उपस्थितीत मृत वाघाची पाहणी करण्यात आली. *महत्त्वाचे म्हणजे वाघाचे नखे, कातडी, दात व इतर सर्व अवयव सुस्थितीत आढळले* आहेत. त्यामुळे शिकारीचा संशय काही प्रमाणात कमी झाला आहे.

मृत वाघाचे शवविच्छेदन राजोली रोपवाटिकेत पशुवैद्यकीय तज्ज्ञांच्या पथकाने पूर्ण केले. मात्र, मृत्यूचे नेमके कारण अद्याप स्पष्ट झालेले नाही. नमुने पुढील विषशास्त्रीय व न्यायवैद्यक तपासणीसाठी प्रयोगशाळेत पाठवण्यात आले आहेत. 

याबाबत माहिती देताना *RFO विनोद धुर्वे* म्हणाले, "वाघाच्या शरीरावर बाह्य जखमा दिसून आलेल्या नाहीत. सर्व अवयव शाबूत आहेत. त्यामुळे विषबाधा, आजार किंवा नैसर्गिक मृत्यू असू शकतो. पोस्टमार्टम व लॅब रिपोर्टनंतरच नेमके कारण कळेल. NTCA च्या मार्गदर्शक तत्वांनुसार सर्व प्रक्रिया पार पाडली जात आहे."

वाघांच्या सुरक्षेचा प्रश्न पुन्हा ऐरणीवर

चंद्रपूर जिल्हा हा 'टायगर कॅपिटल' म्हणून ओळखला जातो. मात्र, गेल्या काही महिन्यांत वाघांच्या मृत्यूच्या घटनांमध्ये वाढ झाली आहे. बिगर वनक्षेत्रात वाघांचा वावर वाढल्याने मानव-वन्यजीव संघर्षाच्या घटना देखील वाढल्या आहेत. या घटनेमुळे पुन्हा एकदा वाघांच्या सुरक्षेबाबत प्रश्नचिन्ह निर्माण झाले आहे.

वनविभागाने परिसरात गस्त वाढवली असून नागरिकांना सतर्क राहण्याचे आवाहन केले आहे. पुढील तपास सुरू आहे.

– दरारा 24 तास प्रतिनिधी, चंद्रपूर

---